काठमाडौं । काठमाडौं को नयाँ बसपार्कमा एक युवतीमाथि सामूहिक बलात्कार भएको छ । सुर्खेतबाट काठमाडौं आएकी ३३ वर्षीया युवतीमाथि गत सोमबार र मंगलबार पटक पटक सामूहिक बलात्कार भएको खुलासा भएको हो ।

सुर्खेतबाट काठमाडौं बसपार्क आईपुगेकी युवतीलाई बसपार्कमा भेटेका मुगुका युवराज बडुवालले गेस्ट हाउसमा लगेको र गेष्टहाउसमा लगेपछि आफ्नो साथि हिक्मत नेपाली समेत बोलाएर बलात्कार गरेको प्रहरीले जनाएको छ । सो रात दुई जनाले बलात्कार गरेको र भोलिपल्ट अन्य ७ जनाले अर्को गेस्ट हाउसमा लगेर ती युवतीलाई बलात्कार गरेको अनुसन्धानबाट खुलेको पनि प्रहरीले जनाएको छ ।

आरोपीहरूले ३ वटा गेस्ट हाउसमा लगेर ती युवतीमाथि बलात्कार गरेको प्रहरीको भनाइ छ । बलात्कारमा संलग्न आरोपी मध्येका युवराज बडुवाल, हिक्मत नेपाली, मुगु घर भएका रतन नेपाली, सुरेश सेजुवाल, दीपक नेपाली, शिवहरी बुढा र अर्घाखाँची घर भएका गोपाल कुमार श्रीस पक्राउ परेको तथा मुगुका हस्त नेपाली र चन्द्र साउद फरार रहेको महानगरीय प्रहरी परिसर काठमाडौंका प्रमुख एसएसपी सुदीप गिरीले बताउनुभयो ।

लामो समयदेखि पति भारतमा बेपत्ता भएपछि काम खोज्न काठमाडौं आएकी दुई सन्तानकी आमा काठमाडौं प्रवेश गर्नासाथ बलात्कारको शिकार भएकी हुन् । बलात्कारको पीडा खप्न नसकेर युवती आफैं गुहार माग्न प्रहरीकहाँ पुगेपछि प्रहरीले बलात्कारीहरुको खोजी गरी पक्राउ गरेको हो ।