पर्यटन मन्त्री आलेद्वारा क्यान्सर पिडितलाई आर्थिक सहयोग: कृतिम खुट्टा पनि उपलब्ध गराइदिने प्रतिबद्धता

२०७८ चैत्र २२ गते, मंगलवार

काठमाडौं । संस्कृति, पर्यटन तथा नागरिक उड्डयनमन्त्री प्रेमबहादुर आलेका पहलमा कैलालीको लम्कीचुहाँ नगरपालिका–७ का २९ वर्षीय गङ्गाप्रसाद न्यौँपानेले कृतिम खुट्टा पाउने भएका छन् । गतवर्षको कोरोना सङ्क्रमणका समयमा भएको बन्दाबन्दीमा ब्लड क्यान्सर भइ भारतमा उपचार गराइरहेका आफ्ना दाजुका लागि बैङ्कमा रकम जम्मा गर्न जाँदा उहाँ लडेर दाहिने खुट्टा भाचिएको थियो । भाचिएको खुट्टाको अप्रेसन सुर्खेत अस्पतालमा गरिएपनि खुट्टाको हड्डी कुहिएकाले खुट्टानै काट्नु पर्ने डाक्टरको सल्लाह अनुसार हाल उहाँको काठमाडौँमा रहेको राष्ट्रिय ट्रमा सेन्टरमा दाहिने खुट्टा काटिएको छ । उहाँको खुट्टा काटिएको आज ११ दिन भएको छ ।

मन्त्री आले आज मङ्लबार राष्ट्रिय ट्रमा सेन्टरमा जानु भइ न्यौँपानेको स्वास्थ्य अवस्थाका बारेमा जानकारी लिनु भएको छ । सोही क्रममा मन्त्री आलेले खुट्टा काटेर उपचार गराइ रहनु भएका न्यौँपानेलाई उपचारमा सहयोग पुगोस भनेर रु २५ हजार प्रदान गर्नु भएको मन्त्री आलेका स्वकीय प्रशासन सहायक भक्तबहादुर आलेले जानकारी दिनुभयाे । यसैगरी मन्त्री आलेले न्यौँपानेको कृतिम खुट्टा हाल्नका लागि मारवाडी सेवा विकास समितिका अध्यक्ष कैलास गाेयलसँग आग्रह गर्नुभएको छ । मन्त्री आलेको आग्रहपछि अध्यक्ष गोयलले न्यौँपानेको कृतिम खुट्टा निःशूल्क रुपमा हालिदिने बचन दिनु भएको छ ।

पशुपति गौशाला धर्मशालामा न्यौँपानेको कृतिम खुट्टा हाल्नुका साथै निःशूल्क खान बस्नको व्यवस्था गर्न समेत मन्त्री आलेले आग्रह गर्नु भएको छ । राष्ट्रिय ट्रमा सेन्टरले न्यौँपानेलाई डिस्चार्ज गरे लगत्तै कृतिम खुट्टा हालिने मारवाडी सेवा विकास समितिका अध्यक्ष गाेयलले जानकारी दिनुभयो । मन्त्री आलेका पहलमा कृतिम खुट्टा पाइने भएपछि आफु निकै खुशी भएको पीडित न्यौँपानेले बताउनुभयो ।

उहाँले भन्नुभयो, “गरिब मान्छे भएको खुट्टा पनि गुमाए, तर मन्त्री ज्यूले कृतिम खुट्टाका लागि पहल गरिदिनुभयो मेरा लागि यो भन्दा ठूलो खुशीको कुरा अरु के हुन सक्छ र ।” मन्त्री आलेले देशका बिभिन्न क्षेत्रका कम्तीमा पनि एक हजार बढी बिरामी तथा पीडितहरुलाई उपचारका लागि आर्थिक सहयोग गर्दै आउनु भएको छ । बिरामीलाई आर्थिकदेखि अन्य सहयोग गर्ने भएका कारण हिजो आज सुदूरपश्चिमेलीहरु बिरामी पर्दा मन्त्री आलेकै घरमा धाउने गर्दछन् ।

160 Views

2021 Copyrights Reserved at buddhabatikaonlin.com

Designed & Developed By Web House Nepal