एमाले उपाध्यक्ष पौडेलद्धारा तिलोत्तमा नगरपालिकाका मेयर र उपमेयरको उम्मेदवारलाई शुभकामना

२०७९ बैशाख १२ गते, सोमबार

रुपन्देही । नेकपा एमालेका उपाध्यक्ष विष्णु पौडेल आफ्नो निर्वाचन क्षेत्रमा रहेको तिलोत्तमा नगरपालिकाको मेयरका उम्मेदवार मोहन चापागाई र उपमेयरका उम्मेदार जागेश्वरीदेवी चौधरीको उम्मेदवार मनोनयनका समयमा पुगेर शुभकामना दिएका छन् ।

पाँचदलीय गठबन्धनविरुद्ध एक्लै चुनावी मैदानमा उत्रिएको एमालेले तिलोत्तमा नगरपालिकामा तामझामका साथ मनोनयन दर्ता गरेको छ ।

एमालेका उपाध्यक्ष विष्णु पौडेल, पोलिटव्यूरो सदस्य लिला गिरी, वर्तमान नगरप्रमुख वासुदेव घिमिरे लगायत सयौं नेता कार्यकर्ताहरुको र्‍यालीसहित तिलोत्तमा शंकरपुरस्थित निर्वाचन कार्यालय पुगेका उम्मेदवारहरुले सोमबार दिउसो मनोनयन दर्ता गरेका छन् ।

नगरप्रमुख तथा उपप्रमुखहरुले मनोनयन दर्ता गर्नुअघि उपाध्यक्ष पौडेलले उम्मेदवारहरुलाई टीका र खादा लगाइदिएर जितको शुभकामना दिएका थिए । तिलोत्तमामा मनोनयन दर्तापछि नेता पौडेल बुटवल उपमहानगरपालिका पुगेका छन् ।

नगरप्रमुख घिमिरेले तिलोत्तमा नगरपालिकाले गरेका राम्रा कामहरुकै कारण देशभर चर्चा बटुलिरहेको अवस्थामा कतिपय कामहरुको दिगो व्यवस्थापन गर्न बाँकी रहेकोले ती काम पूरा गर्ने जिम्मेवारी चापागाईले लिनुपर्ने भन्दै शुभकामना दिएका थिए ।

मेयरमा उम्मेदारी दिएका चापागाईले पार्टी नेतृत्वले दिएको निर्देशनका आधारमा यसअघि सुरु भएका योजना पूरा गर्दै नयाँ योजनाका साथ समृद्ध तिलोत्तमा अभियानलाई पूर्ण बनाउने प्रतिवद्धता गरेका छन् ।

167 Views

2021 Copyrights Reserved at buddhabatikaonlin.com

Designed & Developed By Web House Nepal