न्युजिल्यान्डमाथी इङ्ल्यान्डको शानदार जीत

२०७९ जेष्ठ ३१ गते, मंगलवार

एजेन्सी । मध्यक्रमका ब्याटर जोनी बेयरस्टोको विष्फोटक शतकमा इंग्ल्यान्डले दोस्रो टेस्ट खेलमा न्युजिल्यान्डमाथि ५ विकेटको सानदार जित हात पारेको छ । योसँगै तीन टेस्ट खेलको सिरिज इंग्ल्यान्डले एक खेल अगावै जितेको छ ।

जितको लागि २ सय ९९ रनको विजयी लक्ष्य पछ्याएको इंग्ल्यान्डले ५० ओभरमा ५ विकेट गुमाउँदै पूरा गर्यो । इंग्ल्यान्डको जितमा जोनी बेयरस्टोले ९२ बलमा १४ चौका र ७ छक्कासहित १ सय ३६ रनको विष्फोटक इनिङ खेले । बेयरस्टोले ७७ बलमा आफ्नो टेस्ट करिअरको नवौ शतक पूरा गरेका थिए । जुन लक्ष्य इंग्ल्यान्डले ७२ ओभरमा पूरा गुर्न पर्ने थियो । तर २२ ओभर अगाडिनै पूरा गर्दै सनसनी मच्चाएको छ ।

कप्तान बेन स्टोक्स ७० बलमा १० चौका र ४ छक्कासहित ७५ रनमा अविजित रहे । ९३–४ को अवस्थामा पुगेको इंग्ल्यान्डलाई पाँचौं विकेटका लागि जोनी बेयरस्टो र बेन स्टोक्सले १ सय २१ बलमा १ सय ७६ रनको विष्फोटक शतकीय साझेदारी गर्दै जित दिलाएका हुन् । ओपनर एलेक्स लेस ४४, ओली पोप १८ रनमा आउट हुँदा बेन फोक्स १२ रनमा अविजित रहे । न्युजिल्यान्डका ट्रेन्ट बोल्टले सर्वाधिक तीन विकेट लिए ।

न्युजिल्यान्ड दोस्रो इनिङमा २ सय ८४ रनमा अल आउट भएको थियो । न्युजिल्यान्डका डर्याल मिचेल १ सय ३१ बलमा ४ चौका र १ छक्कासहित ६२ रनमा अविजित रहे । विल योंग ५६ र डेभन कन्वे ५२ रनमा आउट भए । इंग्ल्यान्डका स्टुअर्ट ब्रोड तीन, जेम्स एन्डरसन र म्याथ्यु पट्सले दुई दुई विकेट लिए ।

इंग्ल्यान्ड पहिलो इनिङमा ५ सय ३९ रनमा अल आउट भएको थियो । इंग्ल्यान्डका जो रुट २ सय ११ बलमा २६ चौका र १ छक्कासहित १ सय ७६ रनको शतकीय इनिङ खेले । रुटको यो लगातार दोस्रो र टेस्ट करिअरको २७ औं शतक हो । विकेटकिपर बेन फोक्स ५६ रनमा रन आउट भए । युवा ब्याटर ओली पोप २ सय ३९ बलमा १३ चौका र ३ छक्कासहित १ सय ४५ रनको उत्कृष्ट शतकीय इनिङ खेले ।

ओली पोपको यो टेस्ट करिअरको दोस्रो शतक हो । रुट र पोपले तेस्रो विकेटका लागि १ सय ८७ रनको साझेदारी गरेका थिए । त्यसअघि पोपले दोस्रो विकेटका लागि एलेक्स लेससँग १ सय ४१ रनको साझेदारी गरेका थिए । लेस १ सय २५ बलमा ११ चौकासहित ६७ रनमा आउट भए ।

कप्तान बेन स्टोक्स ३३ बलमा ६ चौका र २ छक्कासहित ४६ रनमा आउट भए । न्युजिल्यान्डका ट्रेन्ट बोल्टले सर्वाधिक पाँच विकेट लिए । म्याट हेनरीले तीन विकेट लिए ।

त्यसअघि न्युजिल्यान्ड पहिलो इनिङमा ५ सय ५३ रनमा अल आउट भएको थियो । न्युजिल्यानडका डर्याल मिचेलले ३ सय १८ बलमा २३ चौका र ४ छक्कासहित सर्वाधिक १ सय ९० रनको उत्कृष्ट शतकीय इनिङ खेले । उनको यो टेस्ट करिअरको तेस्रो, जारी सिरिजमा लगातार दोस्रो र अन्तर्राष्ट्रिय करिअरको उच्च प्रदर्शन हो ।

त्यस्तै विकेटकिपर टम ब्लन्डेल १ सय ९८ बलमा १४ चौकासहित १ सय ६ रनको शतकीय इनिङ खेले । पाँचौं विकेटका लागि मिचेल र ब्लन्डेल ४ सय ८ बलमा २ सय ३६ रनको दोहोरो शतकीय साझेदारी गर्दै विशाल योगफलमा पुर्याएका थिए । नियमित कप्तान केन विलियम्सन भने कोरोनाको कारण दोस्रो खेलमा छैनन् ।

कप्तान टम लाथम २६, विल योंग ४७, डेभन कन्वे ४६, हेनरी निकोलस ३० र माइकल ब्रेसवेल ४९ रनमा आउट भए । इंग्ल्यान्डका जेम्स एन्डरसनले सर्वाधिक तीन विकेट लिए । स्टुअर्ट ब्रोड, बेन स्टोक्स र ज्याक लेचले २–२ विकेट लिए ।

पहिलो टेस्ट खेलमा इंग्ल्यान्ड ५ विकेटले विजयी भएको थियो । तेस्रो तथा अन्तिम टेस्ट २३ जुन देखि लिड्समा सुरुहुनेछ ।

199 Views

2021 Copyrights Reserved at buddhabatikaonlin.com

Designed & Developed By Web House Nepal